Qazancim.az Xəbərlər

Məhkəmə orqanlarında işləmək üçün “kimlərəsə müraciətlər edirdilər, kimlərəsə zənglər olurdu”

qasimov — 2010-04-30T12:46:02Z

Dövlət Qulluğu Məsələləri üzrə Komissiya tərəfindən 42 dövlət orqanı üzrə müsabiqəyə çıxarılmış 771 vakant dövlət qulluğu vəzifəsinin tutulması üçün elan edilən müsabiqənin ilk test imtahanı keçiridi. Komissiyanın sədri Bəhram Xəlilov bildirib ki, müsabiqəyə 4100-dən çox namizəd ərizə verib və hər imtahanda 42 nəfər iştirak edir: “İmtahanlar kompüter vasitəsilə keçirilir. Bunun üçün xüsusi proqram təminatı və test bankı hazırlanıb. Çalışmışıq ilk növbədə imtahanın obyektivliyini və şəffaflığını təmin edək. Test bloku 100 sualdan ibarətdir. Namizədlərə hansı sualın veriləcəyini yalnız kompüter müəyyən edir. Bu gün Qiymətli Kağızlar üzrə Komitəsinə 42 nəfər imtahan verir. Sualları cavablandıran kimi, namizədlər dərhal nəticələri biləcəklər”.

Komissiya sədri deyib ki, test imtahanlarının nəticələri müəyyənləşdikcə paralel olaraq ikinci – müsahibə mərhələsi də aparılacaq. Müsahibə mərhələsi yaxın 10 gün ərzində başlayacaq.

B. Xəlilovun sözlərinə görə, ilk dəfə olaraq məhkəmə orqanları üzrə müsabiqəyə 44 vakant vəzifə çıxarılıb: “Namizədlər arasında məhkəmə orqanlarına maraq daha çoxdur. İndiyə qədər çoxları bu orqanlarda işləmək istəyirdilər. Kimlərəsə müraciətlər edirdilər, kimlərəsə zənglər olurdu. Amma indi hamı üçün bərabər şərait yaradılıb”.

30.04.2010
Qazancim.az

Prezident: Pensiyalar və maaşlar artırılacaq

qasimov — 2010-05-04T09:03:31Z

Prezident Azərbaycanın daha da sürətlə inkişaf edəcəyini, müasirləşəcəyini, beləliklə, ölkəmizin uzunmüddətli inkişaf strategiyasının təmin olunacağını bildirib: “Bu strategiya elə qurulmalıdır ki, təbii resurslardan asılılıq minimum səviyyəyə endirilsin. Biz ölkə iqtisadiyyatını elə qurmalıyıq və elə qururuq ki, təkcə bir sahədən asılı olmayaq. Ona görə şaxələndirmə prosesi Azərbaycanda geniş vüsət alıb. Baxmayaraq ki, 2009-cu ildə dünyada neftin qiyməti kəskin düşüb, Azərbaycan iqtisadiyyatı yenə də artır. Sadə Azərbaycan vətəndaşları o böhranın acı nəticələrini demək olar ki, hiss etməyib. Çünki inflyasiya sabit qaldı, biz qiymətlərin artımına imkan vermədik. Sadəcə qiymətlər 1,5 faiz artdı, maaşlar, pensiyalar vaxtında verildi və bu proses bu gün də davam edir. Bu il də maaşların, pensiyaların artımı nəzərdə tutulur. Bu da olacaq”.

Bunları İlham Əliyev Şirvan şəhərinə aprelin əvvəli səfəri zamanı ictimaiyyət qarşısında çıxışında deyib.

02.05.2010
Qazancim.az

Baş nazir: orta pensiya 104, maaş isə 298 manatdır

qasimov — 2010-03-17T14:29:14Z

Parlamentdə hökumətin hesabatını təqdim edən baş nazir Artur Rasizadə bildirib ki, ötən il Azərbaycan iqtisadiyyatı üçün uğurlu keçib. Beynəlxalq Valyuta Fondu və Dünya Bankı Azərbaycandakı iqtisadi artımı yüksək qiymətləndirib. A.Rasizadə qeyd edib ki, ötən il Azərbaycanda ümumi daxili məhsul (ÜDM) 9,3% artaraq 34 mlrd. manat, orta aylıq əmək haqqı 6,8% artaraq 298 manat olub.

Rəsmi məlumatlara görə, orta aylıq əmək pensiyası isə 104 manat təşkil edib. 2009-cu ildə ölkə üzrə 654 min nəfərə ünvanlı sosial yardım verilib. Yoxsulluğun səviyyəsi 2 faiz azalaraq 11%-ə enib. Baş nazirin sözlərinə görə, respublikada 75 minə yaxın yeni iş yeri açılıb.

17.03.2010
Qazancim.az

Azərbaycanda alimin maaşı – 90 manat

qasimov — 2010-03-15T12:04:14Z

«12 manat işıq pulu, 2 manat qaz pulu, 6 manat da su ilə telefon pulu, 20 manat ancaq kommunal xərclərə gedir» Gənc alim Mahir Şükürlü deyir ki, nə qədər qənaət etsə də, 90 manat maaşının ən azı 20 manatını kommunal xərclərə ödəyir: «Təkcə bir adamın yeməyi üçün gündə ən azı 5 manat lazımdır. Ailəli adama bir aya 90 manat necə çata bilər».

Ona görə də gənc alim ali məktəblərə hazırlaşan uşaqlara əlavə dərs keçir. Elmdə kəşflər eləmək, oturub yaradıcılıqla məşğul olmaq Mahirin də arzusudur. Ancaq iqtisadi sıxıntı içində arzusu elə arzu olaraq qalır. Çünki o əlavə pul qazanmaq haqqında daha çox fikirləşdiyindən yaradıcılıq haqqında fikirləşə bilmir:

«Axtarışların özü xərclər tələb edir. Belə də deyirlər ki, elm fədakarlar hesabına inkişaf edir. Buna ciddi yanaşmıram. Bir tikə çörək axtaran adam heç vaxt elmi həqiqət axtarmaz»

Hal-hazırda Azərbaycanda 10 minə yaxın alim var.

15.03.2010

Azadliq.org

Azərbaycan Əmək və Əhalinin Sosial Müdafiəsi Nazirliyinin Dövlət Əmək Müfəttişliyi apreldən istehsal obyektlərində yoxlamalar keçirəcək.

ehuseynzade — 2010-03-11T14:46:21Z

Azərbaycan Əmək və Əhalinin Sosial Müdafiəsi Nazirliyinin Dövlət Əmək Müfəttişliyi apreldən istehsal obyektlərində yoxlamalarkeçirəcək. "Reydlər müfəttişliyin aprel üçün proqramı əsasında keçiriləcək və onlar iqtisadiyyatın bütün sahələrini, işçilərin hüquqlarının ən çox pozulduğu yerləri əhatə edəcək", - müfəttişliyin rəhbəri Nəbi Şükürlü.

Onun sözlərinə görə, yoxlamalar, əsasən, mövsümi istehsalat obyektlərində aparılacaq. Dövlət Əmək Müfəttişliyinin məlumatına görə, yalnız yanvar-fevral ayları ərzində Azərbaycanda istehsalatda 29 bədbəxt hadisə baş verib. Onlardan yeddisi tikinti sektorunda olub. Həmin dövrdə 10 nəfər həlak olub, o cümlədən, tikinti sektorunda beş nəfə.

Altı halda (üçü tikinti sektorunda baş verib) günahkar müəssisə, 15 halda zərərçəkmiş, dörd halda müəssisə və zərərçəkmiş olub. Dörd hadisə isə kənardan müdaxilə nəticəsində baş verib.

28 aprel Beynəlxalq Əməyin Mühafizəsi Günü elan olunub. Ümumdünya Əmək Təşkilatının məlumatına görə, hər il dünyada istehsalat obyektlərində 2,2 milyon nəfərə yaxın adam ölür.

11.03.2010
Qazancim.az

Azərbaycanda yaşlıların məşğulluq mərkəzləri yaradılacaq

ehuseynzade — 2010-03-10T16:13:12Z

Azərbaycanda Avropa Komissiyasının "Qeyri-hökumət və yerli səlahiyyətli qurumlar inkişafda" proqramı çərçivəsində "Yaşlıların təhsili mərkəzləri kasıbçılığın azaldılması, təhsil və sosial həmrəylik üçün imkan kimi" yeni layihəsi başlanıb.

30 aylıq müddəti əhatə edəcək layihə Azərbaycanın cənub rayonlarında (Masallı, Cəlilabad, Lənkəran, Yardımlı, Lerik və Astara) həyata keçiriləcək. Layihədə iştirakla bağlı bu təşkilatlara müraciət etmək lazımdır - Almaniya Xalq Universitetləri Birliyinin Beynəlxalq Əməkdaşlıq İnstitutu, Aqro-məsləhət QHT və Yaşlıların Təhsili Assosiasiyası.

Layihənin əsas məqsədi Azərbaycanın Respublikasının kənd ərazilərindəki yaşlılar üçün təhsil mərkəzlərinin yaradılması, onların vasitəsilə məşğulluğun və sosial həmrəyliyin artırılmasıdır.

Layihə Avropa Komissiyası (75%) və Almaniyanın İqtisadi Əməkdaşlıq və İnkişaf Nazirliyi (BMZ) (25%) tərəfindən birgə maliyyələşdirilir. Onun ümumi büdcəsi 596,066 avrodur.

10.03.2010
Qazancim.az

45 min əcnəbi Azərbaycanda qanunsuz işləyir

ehuseynzade — 2010-03-09T17:27:56Z

Azərbaycan Miqrasiya Mərkəzi İctimai Birliyinin (AMM İB) hesabatında bildirilir ki, ölkədə 5 min əcnəbiyə əmək fəaliyyətilə məşğul olmaq üçün fərdi icazə verilib. AMM İB-nin prezidenti Əlövsət Əliyevin sözlərinə görə, 45 minə yaxın əməkçi isə miqrant əmək fəaliyyətilə məşğul olur. Onlar əmək müqaviləsi olmadan və qeyri-formal iqtisadiyyat sahəsində fəaliyyət göstərirlər.

“Təkcə “SerbAz” firması tərəfindən əmək müqaviləsi bağlamadan 1500 nəfər əcnəbinin işə götürülməsi faktına görə, dövlət büdcəsindən hüquqi şəxsin mənfəət vergisi kimi ödənilməli olan 9,9 milyon manat gizlədilib”. Ə.Əliyev onu da bildirib ki, yalnız rəhbərlik etdiyi AMM İB məsələyə qarışandan sonra “SerbAz” firması 1500 fəhləyə 3 milyon avro ödəyib.

Qeyd edək ki, həmin fəhlələrin çoxu Bosniya və Hersoqovinadan olub. Onlar 6 aylıq əməkhaqqının verilmədiyi bildirilirdi.

09.03.2010
Moyazarplata.az

Gələcəkdə pensiya ilə ən azı 10 il iş stajı olanlar təmin ediləcək

ehuseynzade — 2010-03-09T17:25:46Z

2010-cu ildə Azərbaycanda pensiyanın minimum həcminin artırılması Azərbaycan Dövlət Sosial Müdafiə Fonduna (DSMF) icbari dövlət sosial sığorta ödənişlərindən daxilolmaların səviyyəsindən asılı olacaq. Fondun rəhbəri Səlim Müslümovun sözlərinə görə, "Azərbaycanın sosial fondu hazırda icbari sosial sığorta üzrə ödənişlərdən vəsaitlərin daxil olmasının səmərəliliyinin təminatı üçün tədbirlər həyata keçirir". Tədbirlər əməyin ödənişinin leqallaşdırılması, əhalinin əmək fəaliyyəti ilə məşğul olan hissəsinin qeydiyyatı ilə bağlıdır.

"Əməkhaqqı fondundan 25 faiz ayırmalar (Azərbaycanda icbari sosial sığorta üzrə ödənişlərin həcmi) ölkədə pensiyaların səviyyəsinin artırılması üçün rezerv yarada bilər", - Müslümov bildirib.

Azərbaycanda minimal pensiyanın səviyyəsi 75 manat təşkil edir. 2010-cu il yanvarın 1-dən Azərbaycanda əmək pensiyalarının əmək stajından asılı olaraq hesablanması üzrə yeni mexanizm tətbiq olunur. Yeni mexanizmə görə, gələcəkdə pensiya ilə 10 il iş stajı olanlar təmin ediləcək. Qalan şəxslər isə sosial müavinətlər alacaq.

2009-cu ildə əmək pensiyaçılarının sayı 27 min nəfər artaraq 1,302 milyon təşkil edib. Bunun 59 faizini yaşa, 35 faizini əlilliyə, altı faizini isə ailə başçısını itirdiyinə görə pensiyaya çıxanlar təşkil edib.

2009-cu ilin sonlarında orta aylıq pensiyanın həcmi 100,4 manat təşkil edib. Ötən il ÜDM-də pensiya ödənişlərinin payı 5,3 faiz olub.

09.03.2010
Qazancim.az

Aydın Bəşirov: “İşləmək üçün xaricə gedən Azərbaycan dənizçiləri geri qayıtmağa pulları olmadığından bəzən dilənmək məcburiyyətində qalırlar”

ehuseynzade — 2010-03-05T16:39:20Z

Azərbaycan Dövlət Xəzər Dəniz Gəmiçiliyinin (XDG) rəisi Aydın Bəşirov azərbaycanlı dənizçilərin xarici sularda üzləşdikləri problemlər və bu problemləri doğuran səbəblərlə bağlı maraqlı faktlar açıqlayıb. Bakıda bəzi adamlar XDG-nin, yaxud ARDNŞ-in gəmiçiliyinin yan yörəsində gəzir, dənizçilərimizi tovlayıb xaricə aparırlar. “Nəticədə işlədikləri şirkətlərdən işə düzəltmə müqabilində faiz alırlar. Azərbaycan dənizçiləri xaricə yüksək maaş adı ilə gedirlər, amma ciblərindəkini də orada qoyub qayıdırlar”, - deyə A. Bəşirov vurğulayıb.

Onun sözlərinə görə, xaricə işləməyə gedən dənizçilər orada 3 aylıq müqavilə bağlasalar da, onları 5-6 ay işlədir, 3 ayın pulunu verirlər. Onların çoxunu isə elə gəmilərə göndərirlər ki, həmin gəmilərin sahibləri bəlli olmur: “Məsələn, gəmi Malta və ya Banqladeş bayrağı altında üzür, sahibi isə Türkiyədə, İtaliyada, yaxud digər ölkədədir. Sonda çox vaxt dənizçilərin gəmi şirkətlərinin sahiblərini məhkəməyə vermələrinin də nəticəsi olmur”.

Xaricə gedənlərə bəzən nəinki maaş, heç geri qayıtmağa belə pul verilmədiyini deyən Bəşirov - İtaliyada, Sinqapurda geri qayıtmağa pul toplamaq üçün dənizçilərin bəzən dilənmək məcburiyyətində qaldıqlarını deyib: «Bir il əvvəl 35 yaşlı dənizçi getdi xaricdə işləməyə, meyiti gəldi. O qədər olub ki, gəmilərdə özlərini asıblar, çoxundan heç xəbəriniz yoxdur».

XDG rəisi hazırda rəhbərlik etdiyi qurumda boş iş yerlərinin olduğunu, mütəxəssislərə ehtiyac duyulduğunu, işçilərə isə xaricdəkindən yüksək əməkhaqqı verdiklərini qeyd edib. Onun sözlərinə görə, Azərbaycanda gəmiçinin əməkhaqqı orta hesabla 1000 manata yaxındır.

O, azərbaycanlı dənizçilərin bəzilərinin xarici gəmilərdə saxta diplomlarla işlədiyini də qeyd edib: “Bəzən xaricə saxta diplomlarla gedirlər. Motorçu hardansa, Batumidən, Ukraynadan 5-6 min dollar verib diplom alır və baş mexanik kimi çalışır. Ya bosmandır, ya matros, amma sertifikat alıb, gəmidə kapitan işləyir. Mən elələrini çox tanıyıram. Elə gəmi var ki, heyət iki yerə bölünüb. Heyətin 70%-i azərbaycanlılar, qalanı ukraynalılar və digər millətlərdir. Kapitan bilmir, fırtınada gəmini necə qorusun”.

Daxili sularda üzən dənizçilər 3 gündən bir ailəsinin yanında olur, həmçinin təqaüdə çıxdıqda yaxşı pensiya alırlar: «İndi başqa variant tapıblar. Gedib xaricdə işləyir, son 3 ili isə XDG-də işləyib buradan pensiyaya çıxmağa çalışırlar. Bu gün XDG-də bütün sahələr üzrə vakant iş yeri var. Gəlsinlər işləməyə, yaxşı sənətkardırlarsa, işə götürəcəyik. Saxta diplomlular isə işə götürülməyəcək. Çünki onlar gündə bir gəmini batıracaqlar”.

05.03.2010
Qazancim.az

Ölkə üzrə ən aşağı əməkhaqqı Şəki-Zaqatala iqtisadi rayonundadır

ehuseynzade — 2010-03-04T16:17:38Z

Ölkədə ən yüksək maaş paytaxt Bakıda çalışan işçilərin payına düşür. Dövlət Statistika Komitəsi işləyənlərin əmək haqqının iqtisadi rayonlar üzrə bölgüsünü açıqlayıb. Bakıdan fərqli olaraq, regionlarda maaşlar xeyli aşağıdır.

2009-cu ilin nəticələrinə görə, ötən il respublika üzrə orta aylıq əmək haqqı 298 manat olub. Ən yüksək maaş Bakı şəhərindədir - 425 manat. Bu sırada ikinci yeri, amma təminən 2 dəfə aşağı maaşla 242 manatla Naxçıvan Muxtar Respublikası tutur. Ölkənin digər iqtisadi rayonlarında əmək haqlarının məbləği 210 manatdan 175 manatadək dəyişir.

Əsas sənaye müəssisələrinin cəmləşdiyi Abşeron iqtisadi rayonunda maaşlar da Bakıdakından aşağıdır - 210 manatdır. Şəki-Zaqatala iqtisadi rayonu isə orta aylıq əmək haqqının səviyyəsinə görə ən aşağı yerdə qərarlaşıb. Ötən il bu regionda işçilərin orta aylıq maaşı cəmi 175 manat olub.

04.03.2010
Qazancim.az

Yunanıstanda böhrana görə pensiyaların verilməsi dayandırıldı

ehuseynzade — 2010-03-03T15:02:32Z

Yunanıstan höküməti ölkənin büdcəsini doldurmaq üçün bağlanması istiqamətində, əhalinin xoşuna gəlməyəcək yeni iqtisadi qərarlar qəbul edib. Bura Əlavə dəyər vergisinin (ƏDV) 21%-dək artırılmasını, pensiyaların bu ilin axrına qədər dondurulub verilməməsi, benzinə 2-7 qəpik arası qiymət artımı, alkaqollu içkilərə 20%, siqaretə isə 65% əlavə vergi qoyulub. Dövlət işçilərinin maaşları və məzuniyyət ödəmələri 30% azaldılıb.

Hökümət açıqlamasında bildirib ki, bu qanunu qəbul etməklə 4,8 milyard avro qənaət etməyi hədəfləyir. Azərbaycan və Avropa ölkələrinin minimal gəlirləri haqda bu yazını oxuya bilərsiniz.

03.03.2010
Qazancim.az

Xərclərinizi azaltmaq üçün gözəl bir imkan

ehuseynzade — 2010-02-24T06:38:31Z

“Vodafone” şirkəti Barselonada keçirilən mobil konqresdə dünyanın ən ucuz mobil telefonunu təqdim edib. Vodafone 150 markalı telefonun qiyməti cəmi 15 dollardır.

İnkişaf etməkdə olan ölkələrdə satılacaq yeni telefonun səsli zənglər, SMS göndərmək, mobil ödəmələr həyata keçirmək kimi xidmətləri var. Vodafone 150 əvvəlcə Hindistan, Türkiyə və Afrikanın 8 ölkəsində, ö cümlədən Lesoto, Keniya və Qanada satışa çıxarılacaq. Bu telefonların Azərbaycanda satışa çıxarılıb-çıxarılmayacağı haqda məlumat verilmir.

Bundan bir az bahalı mobil telefon Vodafone 250-də isə rəngli ekran və FM-radio ilə təchiz olunub. Onun qiyməti 20 dollardır.

24.02.2010
Qazancim.az

Tunel və stansiyalarda 12-13 minə yaxın sərnişin qalıb

ehuseynzade — 2010-02-10T14:41:47Z

Ötən gün Bakı Metropolitenində elektrik enerjisinin kəsilməsi nəticəsində tunel və stansiyalarda 12-13 minə yaxın sərnişin qalıb. Bunu Bakı Metropoliteninin rəisi Tağı Əhmədov bildirib.

T.Əhmədovun sözlərinə görə, tuneldə olan sərnişinlər arasında stress və halsız vəziyyətə düşənlər də olub: «Bu hallar bizim üçün heç bir çətinlik törətməyib və 20 dəqiqə ərzində Metropolitenində qalmış sərnişinlərin hamısı evakuasiya olunub. Ən uzun proses «Ulduz» və «Məşədi Əzizbəyov» stansiyaları arasında olub”.

Qeyd edək ki, ötən gün saat 12:00 radələrində Bakı şəhərinə verilən elektrik enerjisinin kəsilməsi nəticəsində Bakı Metropolitenində qatarların hərəkəti dayanıb. Metroda baş verən hadisə nəticəsində minlərlə adam iş yerlərinə vaxtında çata bilməyib. Saat 14.00-da gərginlik verildikdən sonra qatarların hərəkəti bərpa olunub.

10.02.2010
Qazancim.az

Ərzaq yenidən bahalaşdı

ehuseynzade — 2010-02-04T12:13:39Z

Ticarət obyektlərindən verilən məlumata görə, son bir ay ərzində kərə yağlarının qiyməti növündən asılı olaraq 8-15 % artıb. Ən çox bahalaşma ankor yağıdır - onun topdansatış qiyməti 6 manatdan 7 manata qalxıb. Zelandiya yağlarının kiloqramı 50 qəpik artıb. Yerli istehsal olunan duru yağları isə 5-6 % bahalaşıb. Qiymət artımı özünü şəkər tozunda da göstərib. Son 1 ayda şəkər tozunun kiloqramının topdansatış qiyməti təqribən 4 faiz bahalaşaraq 79 qəpikdən 83 qəpiyə qalxıb. Qəndin kiloqramı 90 qəpikdən 93-ə qalxıb. Ölkənin əsas şəkər tozu olan azərsun şirkəti şəkərin qiymətinin artmasını dünya bazarında şəkər çuğundurunun bahalaşmasıyla izah edir. Amma şrkət əmin edir ki, azərbaycanda qiymət artımı dünya bazarına nisbətən qat-qat aşağıdır – çünki dünyada qiymət artımı təqribən 25 % olub.

Qiyməti artan malların bir hissəsi rusiyadan gətirilənlərdir – qonşu ölkədən gələn peçenye və un məmulatları 8-10%, balıq konservləri 4 % bahalaşıb. Ən çox bahalaşan ərzaq mallarından biri də süd məhsullarıdır. Rusiyadan gətirilən və yerli istehsal olan süd məhsullarının əksəriyyətinin qiyməti təqribən 10 % artıb.

04.02.2010
Qazancim.az

Manat dəyərdən düşür

ehuseynzade — 2010-02-02T14:29:24Z

Yanvar ayında Azərbaycanın milli valyutası ABŞ dollarına nəzərən son 4 ayda ən aşağı səviyyəyə qədər ucuzlaşıb. Avroya nisbətdə isə milli valyutamız ən yüksək həddə qədər bahalaşıb.

Lent.az “İqtisadi forum” jurnalına istinadən bildirir ki, ötən ay Azərbaycan manatı ABŞ dollarına nisbətən 0,1 faiz ucuzlaşıb. Belə ki, yanvar ayı ərzində 1 ABŞ dolları 0,8029-dan 0,8035 manata yüksəlib. Dollar manata nisbətən son 4 ayda maksimum həddə çatıb. ABŞ valyutasının manata nisbətən məzənnəsi sonuncu dəfə ötən ilin oktyabr ayının əvvəlində bu səviyyədə olub.

Xatırladaq ki, 2009-cu ildə Azərbaycan manatı ABŞ valyutasına nisbətən ümumilikdə 0,2 faiz qiymətdən ucuzlaşmışdı. İlin əvvəlində 1 ABŞ dolları 0,8015 manat olduğu halda dekabrın sonuna 0,8031 manata kimi yüksəlib. Ötən il manatın dollara nisbətən ən yüksək həddi (0,8015) yanvarın əvvəli qeydə alınıb.

Avro zonada yaranan gərginlik səbəbindən avronun son vaxtlar digər valyutalara nisbətən ucuzlaşması öz təsirini manata nisbətdə də göstərib. Belə ki, ötən ay manat dollardan fərqli olaraq avroya nisbətən 3,7 faiz bahalaşıb. Yanvarda 1 avro 1,1575-dən 1,1152 manata kimi ucuzlaşıb. Avropa valyutası bununla da son 7,5 ayda minimum həddə qədər dəyərdən düşüb. Avro sonuncu dəfə iyunun 17-də 1,1150 manat olub.

2009-cu ildə isə ümumilikdə manat avroya nisbətən 3,4 faiz ucuzlaşıb. İlin əvvəlində 1 avronun məzənnəsi 1,1123 manatdan ilin sonuna 1,1499 manata kimi yüksəlib. Yeni ildə manat Britaniya funt sterlinqinə nisbətən 0,4 faiz ucuzlaşıb. Ötən ay ərzində 1 funtun məzənnəsi 1,2911 manatdan 1,2962 manata kimi yüksəlib. 2009-cu ildə manat Britaniya puluna nisbətən 10 faiz dəyərdən düşüb.

02.02.2010
Qazancim.az

Naxçıvanda da internet qiymətləri endirildi. Tariflərin siyahısı bizdə.

ehuseynzade — 2010-02-01T12:42:44Z

Naxçıvan internet xidmətləri üzrə tariflər azaldılıb. Amma yenə də Azərbaycanın digər bölgələri və qonşu ölkələrə nisbətən çox bahadır. Muxtar Respublikanın Rabitə və İnformasiya Texnologiyaları Nazirliyinin İnternet Mərkəzinin verdiyi məlumata görə, fevral ayının 1-dən etibarən istifadəçilər internetə daha ucuz və sərfəli qoşula biləcəklər.

Yeni tariflərə əsasən, dial-up üçün internet kartlarının qiymətlərində 60-70 %, simsiz qoşulmada 50% endirim tətbiq edilib. ADSL bağlantısı ilə də qiymətlər ucuzlaşıb.

Nazirliyin saytındakı məlumata əsasən muxtar respublikada ADSL bağlantısı üzrə qiymətlər aşağıdakı kimidir. Sizcə bu qiymətlər qənaətbəxdirmi?

ADSL internet xidməti tarifləri (ƏDV)

64/64 (Kbit/s)
Quraşdırılma haqqı	20 AZN
Ayrılmış xətt abunə haqqı (aylıq)	39 AZN
64/128 (Kbit/s)
Quraşdırılma haqqı	20 AZN
Ayrılmış xətt abunə haqqı (aylıq)	60 AZN
128/128 (Kbit/s)
Quraşdırılma haqqı	20 AZN
Ayrılmış xətt abunə haqqı (aylıq)	75 AZN
64/256 (Kbit/s)
Quraşdırılma haqqı	20 AZN
Ayrılmış xətt abunə haqqı (aylıq)	105 AZN
128/256 (Kbit/s)
Quraşdırılma haqqı	20 AZN
Ayrılmış xətt abunə haqqı (aylıq)	120 AZN
256/256 (Kbit/s)
Quraşdırılma haqqı	20 AZN
Ayrılmış xətt abunə haqqı (aylıq)	135 AZN
128/512 (Kbit/s)
Quraşdırılma haqqı	20 AZN
Ayrılmış xətt abunə haqqı (aylıq)	255 AZN
256/512 (Kbit/s)
Quraşdırılma haqqı	20 AZN
Ayrılmış xətt abunə haqqı (aylıq)	300 AZN
512/512 (Kbit/s)
Quraşdırılma haqqı	20 AZN
Ayrılmış xətt abunə haqqı (aylıq)	315 AZN

Qeyd: Son abunəçi qurğularının (ADSL modem və s.) dəyəri tariflərə daxil edilməmişdir.

Qazancım.az

01.02.10

Qar və şaxta özü ilə birlikdə qayğı kimi, bir çoxlarına xeyir də gətirib

ehuseynzade — 2010-01-29T15:12:01Z

Uzun müddət alıcısı az olan isti qiş geyimləri satanlar sevinsə də, soyuq qarlı-şaxtalı günlər əlavə pul xərcləyib isti geyimlər alanlar üçün bu bir az baha başa gəldi.

Amma bu il qar və şaxta özü ilə birlikdə qayğı kimi bir çoxlarına xeyir də gətirib. Kəskin soyuq havalar qış geyimlərinə bir neçə dəfə ehtiyacı artırıb. Havaların kəskin soyuması ilə geyim mağazalarındakı alıcı qıtlığı aradan qalxıb. Apardığımız araşdırma nəticəsində bəlli oldu ki, xüsusilə uzunboğaz çəkmələr və baş geyimlərində alıcı sayı artıb.

İlin əvvəlindən havaların isti keçməsi qalın qış geyimlərinin satışında durğunluğa səbəb olmuşdu. Havaların qəfil soyuması isə bunun əksinə vəziyyəti gətirib. Söhbətləşdiyimiz satıcılar da bunu təsdiqləyir. Havaların yenidən qızması bu biznesə necə təsir etməsi isə hələlik bəlli beyil.

Satıcılar deyir ki, alıcı qıtlığı yarandığından qiymətlərdə sərfəli endirimlər ediblər. Elə həmin endirimlər indi də davam edir. Sizin fikrinizcə böhran zamanı daha çox pul xərcləyirsiniz ya çox? Maliyyə işlərinizin əslində necə olmasını müəyyən etmək istəyirsinizsə, sizin üçün hazırladığımız bu testdən keçin.

Qazancım.az

29.01.10

Azərbaycanda telefon sorğu xidməti fevraldan tam pullu olacaq

ehuseynzade — 2010-01-28T17:08:29Z

Azərbaycan Rabitə və İnformasiya Texnologiyaları Nazirliyi «Bakı Telefon Rabitəsi» İstehsalat Birliyi (BTRİB) fevralın 1-dən etibarən «109» telefon sorğu xidmətini ödənişli əsasa keçirir.

Tarif Şurasının qərarına əsasən, əhali üçün bir sorğuya xidmət haqqı 20 qəpik, idarə və müəssisələr üçün isə 40 qəpikdir.
Artıq bu xidmətdən istifadə edən abunəçilər «012 109» nömrəsini yığmalıdır.

Hazırda bu xidmətin təqdim edilməsi ilə 120 nəfər işçi məşğuldur. Xidmətin illik gəliri 452 min manat olduğu halda, xərcləri 8,5 mln. manatdan çoxdur.

Qeyd edək ki, ötən həftə Rabitə və İnformasiya Texnologiyaları Nazirliyində keçirilən kollegiya iclasında bu xidmətin rentabelliyinin aşağı olduğu qeyd edilib və bu vəziyyətdən çıxış yolu kimi bu sahədə «Dilmanc» sisteminin tətbiqi təklif olunub.

Beləliklə, bu xidmətin avtomatik şəkildə işləməsini təmin etmək məqsədi ilə «Dilmanc» Azərbaycan-ingilis tərcümə sisteminin nitqin tərcüməsi modulunun tətbiq edilməsi nəzərdə tutulur.

28.01.2010
APA-ECONOMICS

Milli Kitab Mükafatını qazanmaq üçün rüşvət verdilər

ehuseynzade — 2010-01-28T09:02:31Z

Milli Kitab Mükafatının təsisçisi Nigar Köçərli elan olunan mükafata əsər təqdim edən bəzi müəlliflərin yüksək yer qazanmaq üçün rüşvət təkliflər etdiyini deyib. "Pul təklif edən də olub. Hətta kişi ətriyyatları, rayon pendiri, müxtəlif meyvələr gətiriblər. Ancaq sözsüz ki, bunların heç biri qəbul olunmayıb və müsabiqə tam obyektivliklə keçirilir”. N. Köçərli müsabiqə iştirakçılarına müraciət edib: “Münsiflər və ekspertlər adından bildirirəm ki, heç kimə zəng etdirmək və tapşırtdırmaq lazım deyil. Biz qalibi zənglər, tapşırıqlar əsasında seçməyəcəyik. Əgər bundan sonra da zənglər olsa, biz tapşırılan əsəri müsabiqədən çıxaracağıq”.

Milli Kitab Müsabiqəsində I yerin sahibi 3000 manat, II yerin sahibi 2000 manat, III yerin sahibi isə 1000 manat qazanacaq. Bundan əlavə, Gənclər və İdman Nazirliyi bir gənc yazıçıya 1000 manat məbləğində mükafat verməyi planlaşdırır. Sizcə bu yaxşı məbləğdir? Ümumiyyətlə yazıçı işləməklə nə qədər gəlir əldə etmək olar? İş haqqında anketimizi burada doldura bilərsiniz.

26.01.10
qazancim.az

Fevraldan İrana keçmək haqqı 18 manat olacaq

ehuseynzade — 2010-01-28T09:02:50Z

Fevralın 1-dən Azərbaycan vətəndaşları İrana vizasız səfər etmək üçün cəmi 18 manat xərcləməli olacaqlar. İranın Azərbaycandakı səfirliyinin konsulluq şöbəsinin müdiri Behruz Zare Mirzaye yanvarın 26-da bildirib ki, bu vəsait

sağlamlıq haqqında arayış üçün lazımdır.

Onun sözlərinə görə, İrana getmək istəyənlər Bakı, Gəncə

və Lənkəran şəhərlərində müvafiq klinikalarda bu arayışları ala biləcəklər: «Əgər Azərbaycan vətəndaşları İranda 15 gündən çox qalmaq istəyirlərsə, o zaman İranın Daxili İşlər Nazirliyinin Miqrasiya Xidmətinə müraciət edib 3 ay qalmaq üçün icazə ala bilərlər».

Konsulun szlərinə görə, hələlik gündə 200-250 Azərbaycan vətəndaşına İrana getmək üçün viza alır: «Viza rejimi ləğv olunandan sonra İrana gedən Azərbaycan vətəndaşlarının sayı artacaq».

1993-cü ildə Azərbaycanla İran arasında viza rejiminin ləğv edilməsi barədə memorandum imzalanıb, İran hökumətinin bu addımı həmin memoranduma uyğundur. Azərbaycan İran vətəndaşları üçün vizanı indiyədək ləğv etməyib.

26.01.2010
qazancim.az